Ɣef temsalt n unegzum abedlan

Auteur:

Publié: 28/06/08

Tamsalt n unegzum abedlan tuɣal-d ɣer unnar s wudem unṣib deg umeslay n lḥukuma.

Asbeddi n lwilayat timaynutin iqqul din din d tifrat n uguren yettidir umdan deg lecɣal-is aked Ddula.

Neẓra amek adabu ijebbed imurar akken ad isluɣ taswiɛt di tmetti, tikli agi, ihi, mačči d tin iṣṣfan, yernu tezzuɣur kra n tiktiwin tuffirin.

Ma negger tamawt, tikti-agi refden-tt-id tura imi mazal kan aseggas ɣef tefranin n tselwit.

Anwa ara yamnen ciṭṭiḥ maḍi d akken asmil n temdint ar lwilaya, akken ibɣu yili lḥal-is, ad yili d ddwa mgal akraf n tdamsa n tmurt, lemxalṭat imcubbaken ger umdan d Ddula-ines, melba ma nettu tijɛal iččan tamurt ?

Acuɣer, ihi, tikti-agi ur d-tewwi ara tujjya i lwilayat d-ilulen di 1984 ?

Slaɛqel d lmeɛqul, tamsalt d ayen nniḍen.

Aselḥu n lecɣal seg yiwen umekkan kan aked cekk ɣef tewzut d leḥmala n tmurt deg uzzayri, d nutni i yesbedden idles n udabu ɣef tikti tawḥidt, alarmi ula d asget n tsertit n tiklax ur iṣsaweḍ a-t-yerr d amagday.

Ayagi arnu ɣures tabenɛemitt reqḍen akk ayen d-ikkan si temnaḍin ; d ayen d-islalen tijɛal.

Ulac win ur neẓri d akken timsal n tumast n Ddula neɣ lebni asudut d nutenti i d sebba n uguren n yir tameddurt taɣelnawt.