Amuger igerzen gar tarbaɛt n RCD akked 200 yinebgawen n timetti taɣarimt n Wawras.
Xas akken srabes n tegnawt flan-d asali ɣef uxettur n lḥal di tama n usammar n tmurt ayagi ur yelli ara d ugur i wid iqedcen di tmetti taɣaimt n Ɛin tuta, n Tkut, n Meṛwana, neɣ n Arris ad myagaren d watmeten-nnsen n Batna akken ad ttikkin deg umeslay ɣef yimmal azzayri. D immetlen n tdukliwin tidelsanin neɣ n twennaḍt, isdawanen, imɛelmen, inaẓuren, inelmaden, ussan-d meṛṛa ad ssufɣen lɣiḍ-nnsen deg yiwen n tegnitt tasertant timettit iwaɛren nezzeh. Deg tazwara n umeslay, aselway n RCD yefka-d taɣuri wezzilen ɣef temsalt tazzayrit. Nefren Batna i usuddes n temlilit deg wass n umenzu n nuvembeṛ. Taẓayt n ṭrad n timmunent ɣef wennar asarti azzayri mazal-it. D lwaǧeb, fell-aɣ, ad nzuṛ iẓuran d igemmaḍ n tnekra taɣerfant i d-yewwin timmunent. Di 1954, Lezzayer tbubb amḍiq n umussu i yessergagin udem n listiɛmaṛ. Di 2011, tamurt-nneɣ tella gar tmura tečča tejɛal d yir udem agraɣlan. Izzayriyen kkren-d di1954 ɣef tilelli, anegmu adamsan d ilettan daɣen mgal tamuḥqraniy. Di 2011, tilelliyin n yemdanen ttwacuddent yal ass u lebɣi n wemdan yettwattu s uzewweṛ icban tallit n listiɛmaṛ, tadamsa iɣum-itt ubazar, lqanun yettwarkeḍ, taɣdemt anamek-is d zzuṛ. Deg unnar agraɣlan, Lezzayer tsenned ɣer meṛṛa imeṣbaṭliyen tettaɛṛaḍ ad tesseḥbes amzruy iteddun anda igduden ttnaɣen mgal nniḍamat imeṣbaṭliyen. Si 1962, aɣurru d nkeṛ rran tamurt n Lezzayer deg yiwen ubrid ur nessufuɣ yettili d ugur ɣef tdukli leqqaqen d-ilulen seg tnekra yellan d ssiman n tamusni taɣelnawt. Tamusni agi tettewwet sɣur tiɛerciwt d rgionalisme yefkan iɣisi deg tsudsiwin d timetti. Lezzayer yezmer ad iwwet degs uceqqiq. D lwaǧeb fell-aɣ meṛṛa s yimeɣnasen d yiɣerfanen, ad neṭṭef lkil n weɣraq agi. Yal yiwen, yal yiwet ilaq ad ibibb taɛkumt anda ma yella akken ad nweṣṣi, ad nejmeɛ i tanekra taɣelnawt ilmend n uqeɛɛed ara yerren lmul amatu n lecɣal n tebdelt d tsertit ɣer tqaɛett. Taywalt gar yimdanen d ayen igerzen acku ad nesḥassef d akken lḥers d uwexxeṛ ɣer deffir ur ǧǧin ara amḍiq i tlelli n umeslay i yizzayriyen. Neṭṭef iberdan n umennuɣ asmi nella di tuffra, aladɣa taywalt srid. Di1954, Abane, Ben Boulaid, Krim d wiyaḍ ur sɛin radyu neɣ iɣmisen. Kecmen deg wegdud akken ad sfeclen ddiɛyat n yimnekcamen n listiɛmeṛ u ad ssiwḍen izen n tlelli.
Abeddel, ur d-yettas ara sɣur nniḍam d-yessufuɣen 30 000 n yimṣulṭa ikerfen ttawilat uṣiweḍ n baylek akken ad yegg lḥerṣ ɣef tikliwin tiɣerfanin. Ur d-yettas ara sɣur nniḍam d-yettmeslayen ɣef tulya d ṣṣfa deg uselḥu n lecɣal n ddula si tama nniḍen yesufeɣ-d lqanun n tɣiwant ara ikerfen leqdic n wufrinen. Abeddel ur d-yettas ara sɣur nniḍam yebɣan ad yexneq leqdic n yibugaṭuyen win yebɣan ad iẓer amek igga nniḍam azzayri ad iwali kan leryuy yeṭṭef : ayen meṛṛa yexdem tebna ɣef tastatijit n weɣlaq. D tagi i d liḥala n Lezzayer 50 yiseggasen mbaɛd Timmunent. Amennuɣ i ubeddel d aɛiwed n tlalit nuvembeṛ .
Wid meṛṛa d-yemmeslayen deg temlilit agi wten-d ɣef usexdem n yikelyanen n nniḍam sɣur CNES, yefɣen i webrid n leqdic-is, akken ad yesseɣleḍ tiddukliwin s lewɛud ad ddunt deg wahil ines, ɣef leḥsanb n yimḍebber n yiwen n tiddukla n Ɛin Yagut.
Yiwen n uselmad n tesnawit imḍebbeṛ n yiwet n tiddukla yesḥassef ɣef ukraf n leqdic n tiddukla ittḥaraben ɣef twennaḍt. Yiwen uddawan nniḍen, yesḥassef ɣef lebni yeččan akal n tfellaḥt sdat wallen n yimḍebren n tebdelt.
Yiwen unaẓur igger tiɣri deg awal-is imi tamurt tesɛa ccek deg umezruy ines, anda tisudsiwin ttunt u rekḍent iẓuran d tigmi.
Deg awal-is n tagara, aselway n RCD yenna : Neẓra meṛṛa ; liḥala ad-tan di twaɣit. Arraw-nneɣ kecmen deg nniḍam n leqraya amzun d annar timezla ; lerẓaq-nneɣ ttwakrent seg tejɛal d lḥerṣ. Tilawin d yergazen ttnaɣen yal ass deg unnar. Ahil amagday yella s lmendad n yiɣerfanen. Adabu yugin yulya tasertant yettuḥettem fell-as ad yestaɛref. Mbaɛd imi yerra ɣer lḥebs dagi di Lambeze wid d-yebdan amenuuɣ ɣef yizerfan n wemdan, yeṣṣaweḍ ad yeqbel tikta agi. Tamsalt n tigmi tuɣal tettwaqbel sɣur meṛṛa isertanen d imettiyen. Kset aɣbel : taɛessast tagraɣlant n tefranin akken nessuter ad tili d ṭmana i uttekki aɣelnaw di tefranin yeṣfan, ad tettuḥettem ɣef udabu. Ugur akked nniḍam azzayri d akken yettak-d tiririt n diri u yettaɛṭil. Acku ur usɛi ara lebɣi d tezmert n uqeɛɛed n yiman-is.
Adabu yezmer kan ad yessexdem tiḥila akken ad yawi lweqt ɣef wegdud, maca ur izmir ara ad isseḥbes amzruy.
Ulɣu