Azewweṛ n tefranin, s wayen d teglu n tucḍiwin tisertanin, atɛeddi adamsan d leǧruḥ, yeṭṭef di tcerkett immal n Lezzayer si 1962 ar wass-a.

RCD igga s tɛessast tagraɣlant ara yilin d lɛali s tugett d yiwen gar n cceṛt i uttekki ines deg umeslay ɣef tallit n laɛḍil tamagdayt.

RCD yettabaɛen tamsalt agi s tamawt tunfilt yesla ɣef akken tarbaɛt tazzayrit yellan yakan tettemcawaṛ akked Tiddukla n Lurup texdem asuter n tɛessast di tmurt n Luxembourg deg waggur n yunyu.

Timlilit nniḍen tettuhegga ɣef usentel agi di tazwara n tuber di Lezzayer tamaneɣt akked tseqqamut n yizerfan n umdan n Tseqqamut n Lurup.

Nettwali deg temsalt agi daɣen, wid ijebden imurar n nniḍam azzayri ggan abrid i tmuɣli-nnsen deg yiwet n tmuɣli : lɣeḍ ɣer beṛṛa, tuffra ɣef daxel. Acuɣer aḥettem n tuffra ɣef temsalt am ta ?

Di tidett, wid iḥekmen aten-an deg ubrid ur nessufuɣ. Qqaren d akken qeblen taɛessast tagraɣlant u berken ɣef ukaram agi, am akken berken ɣef wiyiḍ, nutni ad theggin afraq n yimuren.

Taɛessast tagraɣlant tesɛa iberdan-is d yiswan. Asizdeg n ufaylu n tefranin, lɛessa ɣef usexdem n tedrimt d wallalen izuyaz qbel neɣ di lawan n lḥemla, taɛessast ass n tefrant, atg� ilaq ma drus setta ar ɛecṛa n wagguren n uheggi.

Amek ara yili lebɣi n ubeddel ma teǧǧiḍ afaylu n tefranin anda wid yemmuten ttbuṭin, neɣ amdan yezmer ad isɛu 2, 4, 6 neɣ ahat 10 n lkartat n lbuṭ qbel 7 ɣef tefranin ?

Tunes, ur tewsiɛ ara am tmurt-nneɣ, u tesɛa tabdelt tif tamurt-nneɣ, tesɛedda akter n 4 wagguren i usemsawi n umuɣen n tefranin.

Am akken yexdem i tdukliwin n warraw n ccuhada di 1982, am tiddukla n yizerfan nn wemdan di 1985, am yikabaren n tsertit di 1988, am sandikat ilelliyen, adabu yessexdem ass-a daɣen aleqqem i wesluɣu n tikta n tama taxṣimt mi ara ur yezmir ara ad tent-ittu neɣ ad ten-izeyyeṛ.

Ɣef tɛessast tagraɣlant d lɛali s tugett, tiririt d ttbut n tugdi n yiɣerfanen ittufeclen s texnanasin : trus, qerriḥ, ifut lḥal.

Lezzayer, ass n 21 ctember 2011
RCD